Ўзбекистонда БМТ Коррупцияга қарши конвенциясининг бажарилиши ҳолати ўрганилмоқда

Бугунги кунда Бирлашган Миллатлар Ташкилоти тузилмалари томонидан БМТнинг Коррупцияга қарши конвенцияси иккинчи босқич обзори доирасида Ўзбекистоннинг коррупцияга қарши курашиш сиёсати ўрганилмоқда.

БМТнинг Коррупцияга қарши конвенцияси (Нью-Йорк, 2003 йил 31 октябрь)нинг 63-моддасига асосан, Конвенция талаблари амалга оширилиши бўйича обзори тегишли даврийликка асосан, Конвенцияга аъзо давлатлар конференцияси томонидан ўтказиб борилиши белгиланган.

Маълумот учун: Ўзбекистон 2008 йил 7 июлда БМТнинг "Коррупцияга қарши конвенциясини ратификация қилди ва шу йили "Бирлашган Миллатлар Ташкилотининг "Коррупцияга қарши" конвенциясига Ўзбекистон Республикаси қўшилиши тўғрисида"ги Қонун қабул қилинди. Ушбу конвенция талаблари коррупцияга оид миллий қонунчиликни таҳлил этиш, зарурий ҳуқуқий меъёрларни қабул қилиш ва шу орқали коррупцияга қарши кураш самарадорлигини оширишни назарда тутади.

Мамлакатимиз 2012-2015 йилларда биринчи мониторингдан ўтказилган. Ўзбекистонни иккинчи босқич мониторингида Мальдив Республикаси ва Нигерия Федератив Республикаси обзорни ўтказувчи давлатлар сифатида танлаб олинган. Обзор доирасида БМТнинг Коррупцияга қарши конвенциясининг 2-боби (“Коррупциянинг олдини олиш чора-тадбирлари”) ва 5-боби (“Активларни қайтариб олиш чора-тадбирлари”) қоидаларининг амалга оширилиши ўрганилмоқда.

Айни жараёнда мамлакатимизнинг аксилкоррупция ислоҳотлари, жумладан, давлат бошқаруви тизимида шаффофлик ва ҳисобдорликни таъминлаш, давлат хизматчиси этикаси, давлат харидлари, молиявий мониторинг, пул ювилишига қарши чоралар, жиноатлардан олинган активларни мусодара қилиш ва қайтариш механизмлари бўйича олиб борилаётган чора-тадбирлар ва уларнинг натижаларини ўрганиш мақсадида учрашувлар ва муҳокамалар ўтказилади.  

Шу муносабат билан жорий йилнинг 17 ноябрь куни БМТнинг Гиёҳвандлик ва жиноятчилик бўйича бошқармаси (ГЖБ) ҳамда Ўзбекистон обзорини ўтказаётган давлатлар — Нигерия Федератив Республикаси ва Малдив Республикаси экспертлари томонидан Коррупцияга қарши курашиш агентлиги, шунингдек, коррупцияга қарши курашишга масъул бошқа давлат органлари раҳбарияти ва ходимлари иштирокида  обзор доирасидаги тадбирларнинг очилиш маросимига бағишланган тадбир бўлиб ўтди.

Маълумот ўрнида: Ўзбекистон Республикаси Президентининг 2020 йил 29 июндаги ПФ-6013-сон Фармонига асосан Коррупцияга қарши курашиш агентлигига БМТнинг Коррупцияга қарши конвенцияси ва Ўзбекистон Республикасининг коррупцияга қарши курашиш соҳасидаги бошқа халқаро шартномалари қоидаларининг бажарилиши билан боғлиқ чора-тадбирларни амалга ошириш ҳамда ушбу йўналишдаги фаолиятни мувофиқлаштириш бўйича Ўзбекистон Республикаси миллий координатори вазифа ва ваколатлари юклатилган.

Тадбирда Ўзбекистон коррупцияга қарши курашиш бўйича халқаро стандартларга содиқлиги ва сиёсий ирода туфайли мамлакатда “барчаси инсон манфаатлари учун” тамойилини таъминлаш, коррупциядан холи жамият учун шароит яратиш бўйича жадал ислоҳотлар амалга ошираётгани тўғрисида маълумот берилди. Мазкур обзор ана шу ислоҳотларнинг натижадорлиги, очиқлиги, халқаро ҳамкорликка Ўзбекистоннинг содиқлиги ва фаол позициясининг яна бир амалий тасдиғи эканлиги таъкидланди. Ўз навбатида, халқаро экспертлар томонидан ҳам Президент Шавкат Мирзиёев раҳбарлигида коррупцияга қарши курашиш давлат сиёсати даражасига кўтарилгани   эътироф этилди.

Хусусан, сўнгги йилларда Ўзбекистонда давлат харидлари тизимининг тубдан ислоҳ қилиниши, коррупция хавфи юқори бўлган соҳаларда рақамлаштириш жараёнлари, манфаатлар тўқнашувининг олдини олиш механизмларини жорий этиш, молиявий мониторинг ва активларни қайтариш бўйича янги институтларни ташкил этиш каби муҳим қадамлар қўйилгани қайд этилди.

Таъкидлаш жоиз, халқаро экспертлар томонидан ўтказилаётган ушбу обзор нафақат халқаро мажбуриятларимизни тўлақонли бажариш, балки миллий ислоҳотларимизни янада такомиллаштириш, самарадорликни ошириш ва коррупция хавфларини кескин камайтиришда муҳим аҳамият касб этади.  

Обзор доирасида давлат хизматини ислоҳ қилиш, давлат харидларида очиқлик ва рақобатни таъминлаш, электрон тизимлар жорий этилиши бўйича амалий тақдимотлар ўтказилади. Фуқаролик жамияти ташкилотлари вакиллари билан алоҳида сессия бўлиб ўтди ҳамда уларнинг мазкур жараёнлардаги иштирокининг амалий жиҳатларига тўхталиб ўтилади.  

Обзор якунларига асосан, экспертлар томонидан тавсиялар ва техник ёрдам бўйича таклифлар шакллантирилади.

Коррупцияга қарши курашиш агентлиги

Ахборот хизмати

1296 150 Босма версияси

Korrupsiyaga qarshi kurashish Axborot xizmati 18.11.2025

• Ҳаволадан нусха олиш