O'zbek
Ўзбек
English
Специальные возможности
"Ochko‘zlik va korrupsiya": Faxriy agentlar poraxo‘rlikda ayblanmoqda
Federal hakamlar hayʼati AQSHning Giyohvand moddalarga qarshi kurashish boshqarmasi (DEA — Drug Enforcement Administration)ning ikki nafar agentini pora olish maqsadida til biriktirish orqali advokatlarga maxfiy maʼlumotlarni oshkor qilganlikda aybladi. Prokurorlarning taʼkidlashicha, nazoratchilarning maʼlumotlarni oshkor qilishlari ayni damda olib borilayotgan yirik ishlar va giyohvand moddalar bilan bog‘liq maʼlumotlarni taqdim etuvchi xabar beruvchilar hayotini xavf ostiga qo‘ygan.
So‘nggi yillarda DEA agentlariga nisbatan federal ayblovlar soni o‘ndan ortib ketgan va endilikda ayblanuvchilar ro‘yxatiga Resio va Kostansolar ham qo‘shildi. Maʼlum bo‘lishicha, agentlardan biri hatto Kolumbiya karteli uchun jinoiy pullarni legallashtirish bilan ham shug‘ullangan. Yana biri Nyu-Yorkning Buffalo shahridagi mafiyani himoya qilish uchun 250 ming dollar pora olganlikda ayblangan.
Mansabdorlar 776 000 yevroni o‘zlashtirganlikda gumon qilinmoqda
Latviya Korrupsiyaning oldini olish va unga qarshi kurashish byurosi (KNAB) Yevropa prokuraturasi (EPPO) bilan hamkorlikda Valka viloyati va Latviyaning boshqa hududlarida joylashgan bir qator muassasalarda 776 ming yevroning talon-toroj qilingani gumoni bilan amalga oshirilgan jinoyat-protsessual harakatlar doirasida tintuvlar, olib qo‘yish va so‘roqlar olib bordi.
KNAB maʼlumotlariga ko‘ra, Valka viloyatidagi mahalliy hokimiyatning ikki nafar amaldagi va bir nafar sobiq mansabdori o‘z mansab mavqeini shaxsiy manfaatlari yo‘lida suiisteʼmol qilib, kompaniya vakili bilan birgalikda Yevropa mintaqaviy rivojlanish jamg‘armasining munitsipal loyihani amalga oshirishga mo‘ljallangan mablag‘ini qo‘lga kiritish, shuningdek, Latviya davlat byudjetidan 32 ming yevro miqdoridagi grantni olish maqsadida noqonuniy harakatlarni amalga oshirgan. Munitsipal loyiha ishlab chiqarish binosi va tegishli infratuzilmani yaratish bilan bog‘liq bo‘lgan.
Tergovchilar tegishli infratuzilma muayyan korxona manfaatlarini ko‘zlab, loyiha shartlarini buzgan holda qurilgan bo‘lishi mumkinligini taxmin qilmoqda.
Korrupsiya tufayli general 5 yillik qamoq jazosiga hukm qilindi
Myanma harbiy sudi yaqin vaqtgacha mamlakat boshqaruv kengashining yuqori martabali aʼzosi bo‘lgan general So Xtutni o‘z mansabini suiisteʼmol qilgani va pora olgani uchun besh yillik qamoq jazosiga hukm qildi.
Global New Light of Myanmar nashrida keltirilishicha, So Xtut turli kompaniyalar iltimosini rad etmasdan, ularning talabiga ko‘ra qo‘l ostidagilarni pasportlar berishga undagan, pora olgan va Ichki ishlar vazirligining Xodimlarni ijtimoiy himoya qilish jamg‘armasi nizomiga oid moliyaviy qoidalarga rioya etilishini taʼminlamagan.
Xabarlarga ko‘ra, Soe Xtut sentyabr oyidan beri poytaxt Neypitavda vaqti-vaqti bilan tergov ostida bo‘lgan - xuddi shu vaqtda harbiy hukumatdagi boshqa generallar va yuqori martabali amaldorlar korrupsiyada gumon qilinib hibsga olingan.
Shahar hokimi korrupsiyada ayblanmoqda
Sidneyning ichki g‘arbiy qismidagi Kanada ko‘rfazi meri Anjelo Sirekas Korrupsiyaga qarshi kurashish bo‘yicha mustaqil komissiya (ICAC) tomonidan ishlab chiqaruvchiga chet elga hashamatli sayohatlar evaziga imtiyozlar berish bilan bog‘liq korrupsion harakatlarda ayblanmoqda.
The Daily Telegraph nashrining yozishicha, janob Sirekas 2015 yilning noyabridan 2019-yilning fevraligacha I-Prosperity Group va uning agenti – merning do‘sti Jozef Chidiak bilan hamkorlikda “jiddiy korrupsion xatti-harakatlar bilan shug‘ullangan” deb topilgan.
“...Do‘stlikning afzalliklari orasida xalqaro reyslar va kamida 18 800 dollarlik turar joy (Sirekas uchun) bor edi”, - deyiladi Korrupsiyaga qarshi mustaqil komissiya bayonotida.
ICACning keyingi tekshiruvlari shuni ko‘rsatdiki, bu afzalliklar janob Sirekasning merlik davrida Kengashga kelgan Rodos mulklaridagi I -Prosperity manfaatlarini qo‘llab-quvvatlashga jalb qilish uchun ishlatilgan, deya xabar beradi Daily Telegraph.
Korrupsiyaga qarshi kurashish agentligi
Axborot xizmati
16.11.2023
