Инклюзив ёндашув асосида коррупцияга қарши курашиш натижалари ва истиқболдаги режалар муҳокама қилинди
Коррупцияга қарши курашиш агентлигида “Ўзбекистонда давлат бошқарувини такомиллаштириш: коррупциянинг олдини олишда инклюзив ёндашув” қўшма лойиҳаси Кузатув кенгашининг навбатдаги йиғилиши бўлиб ўтди.
Маълумот учун: Лойиҳа Коррупцияга қарши курашиш агентлиги, Европа Иттифоқи ва Германия Федерал иқтисодий ҳамкорлик ва тараққиёт вазирлиги (BMZ) молиявий кўмагида Германия халқаро ҳамкорлик жамияти (GIZ), Словениянинг “Минтақавий мулоқот” халқаро ташкилоти ҳамда Латвиянинг Молия ва шартнома марказий агентлиги (CFCA) ҳамкорлигида амалга оширилмоқда.
Йиғилишда 2025 йилда амалга оширилган ишлар натижадорлиги ҳамда 2026 йилга режалаштирилган амалий ҳаракатлар муҳокама қилинди.
Ўтган йили лойиҳа доирасида Transparency International билан ҳамкорликда Ўзбекистонда Миллий ҳалоллик тизимини баҳолаш якунланди. Тошкент ва Самарқандда ННТлар учун давлат харидлари ва очиқ маълумотлар бўйича семинарлар ўтказилди.
Шунингдек, 115 нафар журналист ва блогер суриштирув журналистикаси усуллари, рақамли хавфсизлик ҳамда маълумотлар билан ишлашнинг ҳуқуқий жиҳатлари ўқитилиб, 15 нафар энг фаол иштирокчи учун менторлик ва грант дастури йўлга қўйилди.
Қайд этилганидек, жорий йилда ҳам коррупцияга қарши курашиш соҳасидаги норматив-ҳуқуқий базани таҳлил қилиниб, халқаро ҳужжатлар нормаларининг миллий қонунчиликка имплементацияси ўрганилади.
Шунингдек, ОАВ ҳамда жамоатчилик фаолларининг коррупцияга қарши курашиш борасидаги салоҳиятини ошириш фаол давом эттирилади.
Муҳокамалар якунида ушбу саъй-ҳаракатларни муваффақиятли амалга ошириш бўйича вазифа ва мақсадлар белгилаб олинди.
Коррупцияга қарши курашиш агентлиги
Ахборот хизмати